新一年...

我都係一次過講晒12/31, 1/1 & 1/2呢幾日啦....

12/31
今日個日本朋友來左香港旅行，我晨早起身去左港島太平洋酒店接佢，我送左盒香港奇禮比佢，佢就送左隻DVD比我。先同佢去左茶餐廳食晏， 之後去左上環文武廟，同佢上左D香就同佢搵個師父同佢占掛，佢地全程都係用英文溝通，我就用唔鹹唔淡既英文同佢講野。。。
去完文武廟，就去左摩囉街同銅鑼灣。行到5點幾入左許留山坐低飲杯野，坐到6點半同佢返酒店，我就去join我班同學去唱K佢就等佢個friend之跟佢地自己出去倒數。7點幾到左旺中Neway，佢地已經5點半到左，去到成檯都係野食，都係一貫作風，坐係到食同聽佢地唱歌，之後有個waiter入黎話有野送,，係果D開Party玩具，玩到打黎打去=.=。。。唱到9點半完場，就同佢地行落尖沙咀。行到去佐敦，阿Miu已經奪命魂call我幾次，我就同我班同學分開走，佢地繼續行，我就搭地鐵去尖沙咀諾士佛臺大樹吧。
去到佢地已經飲緊，我就同佢地猜枚勁輸勁飲啤酒，開始倒數時已經醉醉地，半個鐘頭內已經去左3次toilet。。。倒數完左佢地去另一個friend屋企，我就自己一個返屋企。
返到屋企即刻沖涼，之後睇果隻DVD，睇到3點幾就訓左。

1/1
10點半起身，今日繼續帶個日本朋友週圍行下。晏晝我帶左佢地去酒樓食野，因為佢之前同我講話佢想去飲茶。跟住搭地鐵去中環再搭巴士去淺水灣，係天后廟影左D相，超多自由行。。。D人係咁係個人同相機之間行過，勁冇禮貌，又?係到用海水洗手。。。無眼睇。。。之後去左赤柱大街。
行到5點幾，係赤柱廣場巴士站搭車落金鐘太古廣埸食dinner，再搭巴士上山頂。搭巴士途中，坐我地前面果兩條韓國妹勁嘈，再前面有一位乘客係車上面嘔。。。到左山頂落車，又話會得7度但我又唔覺。去到影夜景，勁多日本人，影相又唔會係鏡頭前面走來走去，好有禮貌，同D自由行差幾皮。本原想搭欖車走但超多人，最後都係搭返巴士走。打後落左廟街行左一陣就各自歸家。

1/2
11點9先起，遲到成45分鐘，要人等真係唔係幾好意思。今日都只係同佢去shopping，佢只係買左一對鞋一張poster，我仲帶佢去好景-_-朗豪坊。最後行到10點幾就真係要走啦，感覺真係唔係幾捨得，希望會再有機會見面啦!!!

酒醉三分醒....

好彩仲識自己一個返屋企......